Meer oor Die Boomhuis
Die Boomhuis is in 2016 oorgekoop toe die oorspronklike eienaar weggetrek het uit die dorp. Ons het begin met 2 klassies en het al uitgebrei na twee takke met 6 klasse.
Die Boomhuis se boom simboliseer die Vrugte van die Gees soos in die Bybel beskryf.
Ons streef daarna om hierdie beginsels vir ons kleuters aan te leer in ons dag tot dag aktiwiteite. Ons is ‘n Christelike gebaseerde kleuterskool en dit vorm die basis van die skool asook die personeel.
Ons is ‘n speelskool vir babas en kleuters van 3 maande oud tot 5 jaar. Ons het ook ‘n mamma en kleuterklassie (Bytjies) een keer ‘n week sodat kleuters gewoond kan raak aan die omgewing en die nuwe juffrou leer ken.
Ons skool is oop van 07:30 tot 17:30. Ons bied ‘n nasorg en vakansieprogram aan, teen ekstra koste, vir die volle duur van die WKOD skoolvakansies, behalwe in Desember is ons slegs ‘n klein rukkie toe.
Ons volg ‘n dinamiese leerprogram wat al die aspekte van vroeë kinderontwikkeling insluit deur dit op ‘n spelende, kreatiewe en genotvolle wyse aan te bied. Daarom is ons leuse: “Al spelende leer ons”.
Ons het puik opgeleide onderwyseresse en assistente. Ons streef ook daarna om gereelde indiensopleiding te doen om sodoende op hoogte te bly van die nuutste navorsing.
Ons eienaar
Ek is Caryn Downing en het groot geword op ‘n appelplaas in die Langkloof.
Ek is die oudste van 3 kinders en het van kleintyd af skool-skool gespeel met my poppe of as daar maats kom kuier het. Daar het ons baie buite gespeel en kon kreatief wees. Ek het gevind om buite te wees en te speel ‘n goeie fondasie is vir enige kind en dat hulle soveel leer deur te speel.
Ek het my B.Ed Grondslagfase graad in 2004 verwerf en daarna my Honeurs gedoen in Inklusiewe onderwys.
Ek het ‘n wye ondervinding van kinders vanaf 3jarige ouderdom tot en met Graad 7. Ek het skool gegee by ‘n gehoorgestremde skool, ‘n skool vir outisme en ekstra klasse gegee vir kinders van Gr R tot Graad 7 in alle leerareas.
Ek het ‘n ongelooflike passie vir kinders en om elkeen se volle potensiaal te ontgun.
Ek is die ma van twee pragtige dogtertjies wat my deur ‘n ander perspektief na ‘n mamma en haar kinders laat kyk het na onderwys.
My man is ‘n my anker en ondersteun my in alles wat ek aanpak.
Wat vir my belangrik is van ‘n kind se ontwikkeling, is elke kind se emosionele welstand.
Kinders wat angs en druk beleef kan nie ten volle ontwikkel nie, daarom skep ons by Die Boomhuis ‘n gemaklike en genotvolle leeromgewing waar elkeen teen sy eie pas leer, vorder en groei.
